يا مصر يا بنت اللذينة

يعنى لازم أثبت غرامى بدمى

ولآ لازم اغنى وانبح بحسى ..امى

ولآ لازم أغرق عشان تقومى

هو عشان بحبك لازم تزيدى ف همى

ما انا من زمان بحبك وانتى عارفة

كل الناس والدنيا ف كفة وانتى ف كفة

دا  ولادى ونفسى ودمى فداكى لو كفىّ

ف متعنديش وبطلى تميلى الكفة

عطشانة واجب عليا أسقيكى

بردانة واجب أأقلع هدومى اغطيكى

خايفة اسكن ف قلبك أحميكى

وبعد دا تذلى أيمان اللى فاديكى

يا مصر مهما تعملى ابنك معاكى

ما الجنة تحت رجلك ووياكى

مهما عملتى يا بنت اللذينة بنحبك

ودايبين فى تراب رضاكى وهواكى

من قصيدة البدل(مرثية للرئيس جمال عبد الناصر)

خدوا كل اللى حيلتنا من ألوفات: 

اللى اتنهبوا .. واللى لسه حيتنهبوا 

وردوا للأمة رجولتها ونخوتها وقُدرتها. 

ردُّوها من تابع مذلول 

لزعيمة لاستقلال. 

من قُطعان سايحة .. لرجال. 

ردولها كل اللى سرقتوه من مال. 

ادفعوا عنْها ديون الأطفال. 

ردوا لها شمس المستقبل 

واكنسوا أطنان العتمة من درب الأجيال. 

أخلاق الشعب اللى انداس .. 

واللى أصبح ناس مش ناس !! 

ردوا للشعب رغيفُه المخطوف. 

صوته الأصلى وعرقه المسفُوف. 

وبالمجّانى .. رجعوا للطفل الكراس. 

ابنوا على شط النيل المصنع جنب المصنع. 

رُدوا للجندى المصرى وظيفة المدفع. 

ردُّوا الإنسان العادى ياخُدْ قيمةْ ما يدفع. 

والفلاح ردوه من ذُل الغربة 

وردوله حُبه للفاس. 

رُدوا الوطن المسروق 

اللى اتمرغ فى مخالب السوق. 

فكوا عنه الطوق. 

شِلُّوا القدم الصهيونية الساكنة فى الدقى 

وماشية فى باب اللوق. 

ردُّوا الجمعية للفلاحين 

والمصنع للعمال. 

لو تقدروا تخرجوا مِ الأغلال 

اللى كتفكم بيها اللى علمكم لعبة رأس المال .. 

على اسم مصر

على اسم مصر

 التاريخ يقدر يقول ما شاء 

أنا مصر عندي أحب وأجمل الأشياء

باحبها وهي مالكه الأرض شرق وغرب

وباحبها وهي مرميه جريحة حرب

باحبها بعنف وبرقة وعلى استحياء

واكرهها وألعن أبوها بعشق زي الداء

واسيبها واطفش في درب وتبقى هي ف درب

وتلتفت تلقيني جنبها في الكرب

والنبض ينفض عروقي بألف نغمة وضرب

على اسم مصر 

النسيم في الليالي وبياعين الفل

ومرايه بهتانة ع القهوة .. أزورها .. واطل

القى النديم طل من مطرح منا طليت

والقاها برواز معلق عندنا في البيت

فيه القمر مصطفى كامل حبيب الكل

المصري باشا بشواربه اللي ما عرفوا الذل

ومصر فوق في الفراندة واسمها جولييت

ولما جيت بعد روميو بربع قرن بكيت

ومسحت دموعي في كمي ومن ساعتها وعيت

*****

مصر السما الفزدقي وعصافير معدية 

والقلة مملية ع الشباك .. مندية

والجد قاعد مربع يقرا في الجرنال

الكاتب المصري ذاته مندمج في مقال

ومصر قدامه اكتر كلمة مقرية

قريتها من قبل ما اكتب اسمي بإيديا

ورسمتها في الخيال على أبدع الأشكال

ونزلت أيام صبايا طفت كل مجال

زي المنادي وفؤادي يرتجف بجلال

********

مصر .. التلات أحرف الساكنة اللي شاحنة ضجيج 

زوم الهوا وطقش موج البحر لما يهيج

وعجيج حوافر خيول بتجر زغروطة

حزمة نغم صعب داخلة مسامعي مقروطة

في مسامي مضغوطه مع دمي لها تعاريج

ترع وقنوات سقت من جسمي كل نسيج

وجميع خيوط النسيج على نبرة مربوطة

اسمعها مهموسة والا اسمعها مشخوطه

شبكة رادار قلبي جوه ضلوعي مضبوطة

على اسم مصر 

عند المساء

عند المساء

أرى عينيكى فى نجوم السماء

وضاءة

مثل لؤلؤة ...فترسم مقلتى نظرة شقا

كم ابتعدنا واشواقنا صارت مرهقة

 مثل السنين

التى تخط على مفرقينا الشيب الحزين

وتكسر ما فينا الى نصفين

ويبقى حبك داخلى رغم العناء

 عند حلول كل مساء

أرى عينيكى فى نجوم السماء

لؤلؤة

مدارسنا ومدارسهم

في أرضنا للأجانب ، ألف أسكـولة
يخرجو بالألوف من غول إلى غولة
عارفين لجلب المكاسب ستميت حيلة 
ويجمعنا من جيوبنا المال بالكيــلة
واحنا وزارة معارفنا أم هلـيـــله
أم الحيطان والبيان، والحطة والشيلة
تاخذ ولادنا وبفلوسنا وبالتيــــلة
اشطر ما فيهم ما يكسبش عشا ليـلة
واجدع ما فيهم يقـول يا ست وسيلة
شوفي لنا حتة وظيفة تستر الميــلة 

على الدنيا السلام

حين اغتالوكى فى عينيا كان على الدنيا السلام

ومن احشاء قلبى اجهضوكى كان على الدنيا السلام

وابعدوكى عنى باوامرهم العرفية

وراقبونا بأعين من الانانية

والقوا بشظايا قلبينا الى  اليم  واعلنوا قتل الاحلام

فإن على الدنيا السلام

لا تفرحوا ايها الجبارين باحكامكم العتيقة

فالاحلام لا تقتل والحب يبقى حقيقة

رغم المسافات يظل حبيبى

رغم السلاسل والقيود يظل حبيبى

حتى وان بتنا فى الم الشوق والغرام 

سنرجع يومآ وتلتقى يدانا بالسلام 

قررت الرجوع

يئست من كتاباتى عنك وأنت لا تقرآينها

فقررت اجهاض قلمى وقتل كلماتى كلها

.

.

.

وحين رأيتك فى منامى كل يوم أدركت أنك

حتى إذا خبأت كلماتى تعلمينها

لذا قررت الرجوع

أحبك